Գիրքը լավն է, եթե հեղինակը նրանում արտահայտում է միայն այն, ինչ պետք է, և այնպես, ինչպես պետք է: Արիստոտել
Մեր օրերում ընթերցանությունը խթանելու համար տարվում են բազմաթիվ միջոցառումներ:
Սակայն, երբեմն դրանք անարդյունք են, քանի որ աշակերտները չեն հետաքրքրվում տվյալ թեմաներով կամ հեղինակներով: Երբեմն,բացի դպրոցական ծրագրով հանձնարավող գրականությունը, նրանք այլ գրականություն չեն ընթերցում, առավել ևս` ժամանակակից:
Այս խնդիրներին փոքր-ինչ լուծում տալու համար դպրոցում կազմակերպեցինք հանդիպում ժամանակակից գրող- արձակագիր Տաթև Մաղաքյանի հետ: Վերջինս մեր համագյուղացին է և կարող է լավ օրինակ հանդիսանալ երեխաների համար:
Նախագծի ընթացքը
Նախօրոք զրույց ունեցանք արձակագրի հետ: Նա փոխանցեց իր արդեն իսկ հրատարակած գրքերը և այն գիրքը, որի շնորհանդեսը պիտի կայանար մեր դպրոցում:
Այդ գրքերը փոխանցեցինք աշակերտներին: Նրանք ընթերցեցին,և մինչև հեղինակի հետ հանդիպումը հավաքվեցինք և քննարկեցինք: Կազմեցինք հարցեր գրքերի վերաբերյալ, որպեսզի հղենք հեղինակին:
Քանի որ փետրվարի 19-ը գիրք նվիրելու օրն է, խորհրդակցեցինք դպրոցի տնօրենի, ինչպես նաև գրականության ուսուցչի հետ և որոշեցինք, որ հանդիպումը հեղինակի հետ հարմար կլինի իրականացնել հենց այդ օրը:
Փետրվարի 19-ին կայացավ հանդիպումը: Աշակերտները նախ ներկաներին պատմեցին հեղինակի մասին, ներկայացրին վերջինիս կենսագրությունը, արտասանեցին նրա ոչ այդքան հայտնի բանաստեղծություններից:
Այնուհետև աշակերտները հարցեր ուղղեցին գրողին։Նրա հետ քննարկեցին իրենց դուր եկած պատմվածքները:
Մթնոլորտը ջերմ էր և տրամադրող: Երեխաները գրողի հետ քննարկեցին նաև մերօրյա այլ հեղինակների գործեր, ինչպես նաև անդրադարձան լոռեցի այլ գրողների ստեղծագործություններին։
Քանի որ գիրք նվիրելու օրն էր, արձակագիրը ներկաներին, ինչպես նաև գրադարանին նվիրեց իր գրքերից:
Երեխաներին նախօրոք տեղեկացվել էր, որ կարող են իրենք ևս միմյանց նվիրել գրքեր: Երեխաները ոգևորված միմյանց գրքեր էին նվիրում` պայմանով, որ պիտի ընթերցեն և հետո քննարկեն:
Ծրագիրը կունենա շարունակական բնույթ: Կկազմակերպենք հանդիպումներ այլ հեղինակների հետ ևս, սրանով իսկ խթանելով ընթերցանությունը աշակերտների շրջանում: